政Whats噏：菲外長來港　蔡冠深冀修補關係

中華總商會將會喺下月初，於遮打花園舉辦「一帶一路繽FUN遊」，有菲律賓外交部長來港主禮，會長蔡冠深就估計，菲律賓較重視今次活動，係唯一一個國家有外交部長嚟到，通常呢啲活動都只有總領事出席，他約於一兩星期前接獲通知外長能夠主禮，相信對方希望修補以前嘅關係，令關係更進一步。

蔡冠深話，「大家都記得我哋以前有少少嘢㗎啦」，對方今次有外長出席，係想對接工商事宜，以示除咗外傭以外，菲律賓亦歡迎港人旅遊，以前嘅環境已經變晒，希望修補以前嘅關係，令關係更進一步，另外，菲律賓今年係東盟嘅主辦國，所以好多活動都積極參與。

除咗菲律賓外長會來港，今次亦有十多個國家的總領事會出席，蔡冠深透露，安排各國排位上，都要花心思，舉例指以色列與中東國家要分開，如果放埋一齊「會出事㗎」。是次活動有多個國家的美食及表演，籌委會成員陳光明指，希望各國在港嘅僑民可以參與活動，今次亦有虛擬實景，讓參加者欣賞絲綢之路，引起佢哋日後有興趣去當地旅遊喎。

本文來源：http://hk.on.cc/hk/bkn/cnt/news/20171127/bkn-20171127171102804-1127_00822_001.html